Протести во Шпанија поради новата левичарска Влада

Додека новата лева коалициска Влада предводена од премиерот Педро Санчез влегува во Кабинетот, десетици илјади Шпанци синоќа излегоа на улици стравувајќи од евентуалното „распаѓање“ на Шпанија.

Шпанската социјалистичка работничка партија (ПСОЕ) и помалата левоориентирана Унидас Подемос синоќа му ги преставија на кралот Фелипе Шести своите министри откако добија тесно мнозинство во Парламентот минатата недела. За таа Влада гласаа 167 пратеници и 165 беа против неа, претежно од десницата.

Санчез, кој е на власт од јуни 2018 година, доби нов мандат откако 18 пратеници за независност на провинциите Каталонија и Баскија, беа воздржани. Тие не гласаа затоа што Санчез им вети разговори за иднината на Каталонија, провинција со население од 7,5 милиони луѓе.

Десетици илјади Шпанци излегоа вчера во координиран протест против Владата во која првпат се Унидас Подемос, единствената голема партија за поддршка на референдумот за независност на Каталонија.

Премиерот Санчез со Каталонската републиканска левица (ЕРЦ), најголемата партија за независност на Каталонија, договори преговори. ЕРЦ најави дека ќе разговара за се, вклучително и „самоодредување“.

Демонстрантите најавуваат нови собири „за обединета Шпанија“.

Шпанија минатата недела ја доби својата прва коалициска влада по 80 години, а новите министри денеска ќе ги заземат своите места.