Се намалуваат нарачките за индустриските производи во Германија

Нарачките од германските производствени капацитети се намалуваат повеќе од очекуваното, објави денеска германското Министерство за економија, додавајќи дека намалувањето од 0,7 отсто се должи на помалата побарувачка дома и во другите земји на еврозоната.

Како што јави дописникот на МИА од Берлин, намалувањето на нарачките е поголемо за 0,2 отсто од регистрираниот пад во декември 2015 година, кога порачките беа помали за 0,4 проценти.

За разлика од нарачките од Германија и од другите членки на еврозоната, побарувачката за германски производи од земјите надвор од заедничката монетарна унија е зголемено за 5,5 проценти, што сепак не придонесува за стабилна општа побарувачка.

Германската Влада неодамна го намали предвидувањето за раст на економијата од 1,8 на 1,7 отсто за тековната година, поради послабиот раст на светско ниво и внатрешните политички тензии.