Сириската армија прогласи 48-часовно примирје во јужниот град Дара

Сириската армија објави денеска дека ќе ги запре воените операции во јужниот град Дара за период од 48 часа од денеска на полноќ.

Примирјето ќе почне во 24:00 часот по локално време и има цел да ги поддржи напорите за помирување во земјата.

Војската ова го објави неколку дена откако градот беше подложен на некои од најтешките борби изминатите месеци во услови кога опозициските активисти стравуваат дека Владата се обидува да го преземе Дара, каде граѓанската војна почна пред шест години. 

Истовремено сириската армија и силите, кои ја поддржуваат ги прошируваат воените операции јужно од реката Еуфрат.

Владините сили денеска ослободиле од контрола на исламистите три населени места, распоредени покрај патот Атраја-Расафа-Рака.

Копнените сили биле поддржани од воено-водухопловните сили, кои извршиле напад врз база на Исламска држава во градот Расафа, 30 километри јужно од Рака. Во операцијата армијата ослободила од терористите територија од 22 илјади километри квадратни јужно од Еуфрат.

Изминатите два дена силите на режимот во Дамаск ја вратиле контролата на две нафтени наоѓалишта југозападно од Рака.