Стојановиќ: Град за азиланти нов проект на ЕУ за Србија

Претседателот на собранискиот Одбор за одбрана и безбедност Момир Стојановиќ изјави дека во Србија наскоро би можел да се отвори центар за 400 илјади азиланти, но министерот за социјални прашања Александар Вулин нагласи дека изградбата на таков центар не е во план, ниту пак е возможна. 

- Со оглед на тоа дека ЕУ нема решение за големиот проблем со имигрантите, една од можностите е да ја финансира изградбата на голем центар за имигранти. Се шпекулира дека ЕУ сака таков центар некаде на Балканот, а дека има големи шански тоа да биде токму Србија. Исто така се зборува дека локацијата за центарот би била некаде на југот на Србија и дека таков град за азиланти најверојатно би бил од монтажен тип, изјави Стојановиќ за „Блиц“. 

Тој меѓутоа нагласи дека Србија не би требало да се согласи со ова. 

- Се надевам дека нема да има притисок врз нас за да се согласиме со изградбата на таков центар, бидејќи само доколку една петина од тие луѓе би останале во Србија, тоа би бил голем економски и безбедносен проблем, наведе Стојановиќ. 

Од друга страна, министерот за социјални прашања Вулин ги негира сознанијата на функционерот на СНС и вели дека изградбата на таков центар ниту е во план, ниту е можна.