Технички и организациски промени на Клиниката за пулмологија и алергологија

Клиниката за пулмологија и алергологија со технички и организациски промени ќе им го олесни пристапот на пациентите. Наместо неколку, воведен е едношалтерски систем, како и електронска сигнализација со реден број на чекање за одредени услуги, реорганизирано е работното време на персоналот за да биде подостапен. За дневната болница има утврден распоред со термини за сите лица што примаат терапија.  

- Секој пациент доаѓа во време одредено за него, со што ја искоренивме досегашната практика повеќе пациенти да чекаат ред и на крај да примаат терапија на ист кревет. Затоа го продолживме времето кога пациентите може да примаат терапија во дневната болница до доцна попладне, а персоналот е засилен со уште еден специјализант кој на Клиниката е присутен до 22 часот, рече директорот на Клиниката, д-р Дејан Докиќ, кој на прес-конференција ги соопшти промените.

Дневната болница е одвоена од болницата со хоспитализираните пациенти со дополнително направена врата која за цивили функционира со картичка. Зголемена е значително  хигиената за да се спречи појава на инфекции - пред влезот во болницата со болни што лежат е поставен апарат за автоматско навлекување најлонски калчинки кои се задолжителни за посетителите.  Пристапот во салата за бронхоскопија е ограничен со што, рече Докиќ, многукратно е зголемена стерилноста. Поставен е систем за аудиовизуелен контакт со пациентите што чекаат да влезат. 

Набавени се нови чаршафи и перници за сите пациенти, како и униформи за вработените. Во собите на ѕид се монтирани специјални мерачи за притисок, воведен е систем за информирање на пациентите, како и постојан видеонадзор во целата клиника. 

Д-р Докиќ соопшти дека Клиниката добила уште еден бронхоскоп кој десет години стоел неотпакуван во магацин на болницата во Штип. Директорот на штипската болница и го отстапил апаратот на Клиниката за користење. Докиќ нагласи дека постојано имаат проблем со набавка на бронхоскопи кои се потрошни апарати, а на Клиниката за пулмологија се изведуваат 70 проценти од сите бронхоскопии во Македонија.

- Сите промени кои во изминатиотв период се направени на Клиниката се исклучиво по пат на донации од домашни и од странски компании, односно не потрошивме ниту еден денар од буџетот на Клиниката, рече д-р Докиќ на прес-конференцијата на која присуствуваше и заменик-министерот за здравство Гоце Чакаровски.  

Поради временските услови и загадувањето кои предизвикуваат влошување на состојбата на хроничните болни, веќе два месеца секојдневно функционира и приоритетна амбуланта во која се примаат по дваесетина пациенти кои не можат да чекаат термин и доаѓаат со приоритетни упати. 

Болницата за хоспитализирани има 50 кревети (48 обични и два апартмана). Во дневната болница има два кревета на кои се распределуваат од осум до десет луѓе со точно утврден распоред за терапија, која трае и по три часа.