Тимоние: Компромисите треба сами да ги постигнете

Францускиот амбасадор Кристијан Тимоние вечерва изјави дека разговорите за процесот Жан Моне во моментов се прелиминарни и оти за нив треба да се согласни сите политички партии.  

- Ние посакуваме Собранието овде да функционира, затоа што во моментов не функционира така добро како што би требало. Јасно е дека треба да се најдат начини повторно да се најде довербата меѓу политичките партии, но и методи за да може подобро да се работи заедно, рече Тимоние во интервју за Телма.

Потешкотијата за работење заедно, како што кажа, не е нова затоа што постоела и во претходниот парламентарен состав, како и во актуелниот.

- Вие треба да ги најдете решенијата бидејќи идејата е Македонија да влезе во ЕУ каде што постојано се постигнуваат компромиси. Првата работа што треба Македонците да ја направат е да се обидат прво меѓу себе да ги најдат компромисите или методите за работа за една парламентарна демократија која што би била функционална. Ние може да интегрираме само една функционална демократија, истакна францускиот амбасадор.  

За тоа дали на евентуалните разговори во куќата на Жан Моне кај Париз би се направил обид за компромис за спорот со името, Тимоние рече дека за тоа може да се прават голем број шпекулации.

- Ако треба да се направи таа средба надвор од земјата тоа значи дека е неопходна дискреција поради причини кои можеби јас не ги знам. Но ако сакаме овој проект, кој што е добронамерен, да успее би било опасно да биде под лупата на телевизиите и на новинарите, посочи Тимоние.  

Смета дека политичките партии и пратениците, кои што се платени за тоа од страна на граѓаните, треба да најдат начин самите да зборуваат, затоа што Македонија не е во граѓанска војна.