Трамп: Негативна одлука на Врховниот суд во однос на царините би било закана за националната безбедност

Евентуална негативна одлука на Врховниот суд на САД во врска со царините наметнати од актуелната администрација  би претставувала „закана“ за американската безбедност, предупреди американскиот претседател на својата социјална мрежа „Трут соушл“.

„Најголемата закана во историјата за националната безбедност на САД би била негативна одлука на Врховниот суд во врска со царините“, напиша американскиот претседател. „Би останале финансиски незаштитени.“

Трамп заедно со објавата постираше и фотографија од францускиот претседател Емануел Макрон, кој минатата недела беше во посета на Кина. Макрон во неделата му се закани на Пекинг со царини „во следните месеци“ доколку Кина не преземе мерки што ќе и овозможат на Европската Унија да го намали својот трговски дефицит, кој постојано расте.

„Сега Европа ќе воведе царини за Кина, како што веќе прави со други земји“, изјави Доналд Трамп по тој повод.

„Благодарение на царините, кои се применуваат лесно и брзо, нашата национална безбедност беше значително подобрена и ние станавме убедливо најсилната земја во светот во финансиска смисла. Само мрачни и злобни сили би сакале тоа да заврши!!!“, додаде Трамп.

МИА