Триметарски мозаик на Александар Македонски во Неготино

Триметарски  мозаик со ликот на Александар Македонски денеска започна да се изработува на еден од ѕидовите на  Центарот за култура „Ацо Ѓорчев"  во Неготино. Настанот е во рамките на Фестивалот „Манастирски фолклорни средби", кој го организира оваа културна институција. Проектот го реализира турскиот уметник М.Рафет Озалп. 

-Мозаикот се изработува  од разнобојни ситни корејски каменчиња и ќе се гледа од самиот плоштад,  со што ќе се придонесе за разубавување на централното градско подрачје. Уметничкиот перформанс ќе трае неколку дена. Дел од спектаклот можат да бидат сите заинтересирани, рече Мирјана Јованова, директорка на Центарот. 

Според Кенан Балкан од Турција, еден од учесниците во овој проект значајноста на личноста и делото на големиот војсководец, долгогодишната соработка со неготинската културна институција и македонските корени на дел од турските организатори и уметници, биле пресудни грандиозното дело да се реализира во градот на виното. 

-Станува збор за многу значајна личност од историјата. Истакнат воин и војсководец кој според нашите сфаќања, имал идеја да ги обедини народите од истокот и западот заедно со нивните традиции и култури, Во Турција има многу остатоци кои сведочат за неговото постоење. Решивме тоа да се направи во Неготино  бидејќи наидовме  на разбирање, одобрување и поддршка за овој проект од страна на Јованова со која соработуваме на повеќе проекти во изминатите години. Но има и друга поврзаност, а тоа е дека моите родители имаат македонски корени и потекнуваат од село Корешница, додаде Балкан, пензиониран професор по историја кој сака да добие македонски пасош и да живее во Македонија. 

Во изработката на мозаикот помагаат основци и средношколци од Неготино.

За време на фестивалските денови,  ќе биде отворена и изложба на тројца уметници од Турција. Освен делата на авторот на мозаикот, присутните ќе можат да уживаат и во изработките на  Ајхан Искендероглу кој е уметник за мермер и Енгин Бирсој, уметник за дрво. Ајхан е по потекло од Макаедонија.