Тројца инфицирани со ХИВ годинава во Штип

Три нови случаи со ХИВ инфекција се регистрирани годинава во Штип. Директорот на Центарот за јавно здравје-Штип, Велик Грков изјави дека првиот случај на заболен од СИДА во Штип е регистриран во 1987 година.

Посочи дека од тогаш до денеска има 12 заболени, од кои седум се ХИВ позитивни, а осум се болни од СИДА. Тројца од заболените се починати.

- Во Штип имаме три нови случаи од кои два се ХИВ позитивни, а едно лице е починато, рече Грков.

Истакна дека иако живееме во време, кога лесно може да се обезбедат информации за начинот на пренесување на оваа болест, но и како да се заштитиме, сепак, потенцира, се уште постојат непознавања од оваа област, посебно кај младата популација.

- Се прават напори да се запознаат и учениците и младите преку кампањи. Една од тие кампањи е и денешниот ден Светски ден на борба против СИДА-та. Меѓутоа, мислам дека се уште има непознаници кај младата популација. Затоа е потребна едукација која ќе биде континуирана, без прекин, преку медиумите, предавања, потенцира Грков.

Тој додаде дека во Програмата за работа на Центарот за јавно здравје-Штип имаат предвидено да одржат 60 предавања за оваа болест. Апелира оние кои имале ризични сексуални односи да направат тестирање во центрите за јавно здравје.