Туристичкиот производ на Македонија на меѓународниот туристички саем „RDA Workshop” во Келн

Во организација на Агенцијата за промоција и поддршка на туризмот (АППТРМ) прв пат Македонија и туристичките агенции од земјава, ги претставуваат туристичките потенцијали на меѓународниот туристички Б2Б саем „RDA Workshop” во Келн, Германија, кој се оддржува од 21 до 23-ти јули оваа година.

Како што стои во денешното соопштение од АППТРМ, туристичките агенции и хотелијери ги промовираат туристичките производи на Македонија на нов модерен штанд со промотивни материјали и конкурентни туристички понуди за европските и светските туристички бизнис работници и потенцијални туристи. 

Германскиот туристички пазар, се посочува во соопштението, е се поатрактивен за Македонија поради директните авионски линии на Wiz Air со Германија, од Скопје до Минхен-Меминген, Дортмунд, Келн, Франкфурт, Нирнберг, Хамбург и Фридихшафен. Уште една директна линија на Germania Flug од Скопје до Дизелдорф.

„RDA Workshop” во Келн, Германија е водечки меѓународен саем кој претставува туристичка работилница и B2B настан на европскиот туристички пазар. Давателите на услуги од сите сектори на туризмот ги презентираат своите идеи и производи за утрешниот туристички бизнис.

Целта на туристичката работилница е да се идентификуваат новите трендови, да се здобијат со преглед на палета на производи и дестинации, да се споредуваат услугите и да се направат поконкурентни туристичките продукти, да се воспостават нови и да се одржуваат контактите помеѓу туристичките работници и компаниите, да се разменат искуства и да се добијат нови инспирации за атрактивни туристички производи.