Учесниците на меѓународната конференција за Либија повикаа за прекин на огнот

Учесниците во меѓународната конференција за Либија повикаа за прекин на огнот, со цел да се овозможи подготовка за постигнување спогодба за составување на влада на национално единство, изјави американскиот државен секретар Џон Кери. 

- Насилството и конфликтот траат веќе подолг период, рече Кери по завршувањето на конференција во Рим. 

Според него повеќето претставници на двете сопернички влади на Либија се подготвени да потпишат спогодба.

Кери нагласи дека групацијата Исламска држава заезема позиции во Либија, а сето тоа претставува закана за светската безбедност.

- Не смееме да дозволиме да се задржи статусквото во Либија. Тоа е опасно за самите Либијци, а сега кога таму свои позиции зазема и ИД, тоа е опасно за целиот свет, додаде тој.

Конференцијата, во која учествуваа 17 држави, беше организирана на иницијатива на Италија со поддршка на САД, со цел да се даде поттик на преговорите со посредство на ОН за составување влада на национално единство.

Учесниците и ветија на Либија поддршка во областите на политиката, економијата и безбедноста.