Украинската вицепремиерка вели дека Русите заробиле 1.700 Украинци, вклучувајќи 500 жени

Русија и проруските сепаратисти заробија 1.700 луѓе, изјави украинската вицепремиерка Ирина Верешчук.

Во интервју за „Ројтерс“, таа рече дека меѓу заробените има 500 жени. Вели дека се принудени да стојат, дека им се избричени главите и дека мораат да се соблекуваат секојдневно „поради преглед“.

„Тие го газат човечкото достоинство. Слушнав информации за силувања, скршени кичми… Сакаат да се плашиме, сакаат да плачеме и да бидеме жртви, но не сме. Нашите девојки и жени бараат од нас да продолжиме да се бориме“, рече таа. Верешчук е задолжена за преговорите за размена на заробеници со Русија и хуманитарните коридори од опколените градови.

Таа завчера најави трета размена на заробеници со Русија, со што обезбедила ослободување на 26 Украинци, меѓу кои и 10 жени. Русија постојано негира дека извршила какви било воени злосторства.