„Уметничка пролет“ за патронатот на Универзитетот „Гоце Делчев“ во Штип
Со концерт на пијанистката Емилија Попивода, Музичката академија при Универзитетот „Гоце Делчев“ утревечер во Мултимедијалниот центар во Штип ќе ја почне манифестацијата „Уметничка пролет“ по повод десетгодишнината на УГД.
Деканот на Академијата Тони Китановски на прес-конференција рече дека по повод патронатот на Штипскиот универзитет, кој се прославува на 23 март, тој ќе настапи со Влатко Стефановски, во придружба на Никола Ристановски кој ќе интерпретира поезија од Ацо Шопов. Најави дека студенти од Музичката академија на патронатот на отворено ќе имаат концерти на неколку локации во Штип, меѓу кои и кај Музејот и на Градскиот плоштад.
Во мај ќе организираат настап на новосоздадениот Биг бенд, со кој се обновува традицијата која, како што рече, почнала по Втората светска војна со Биг бендот „Македонка“.
- Сега ние ја обновуваме таа традиција, со заеднички сили со неколку музичари, млади и извонредни од Средното музичко училиште, како и студенти и нивни професори од Академијата, рече Китановски.
Додаде дека преговораат со познати музичари за концерти во текот на април на Штипскиот универзитет, во рамки на „Уметничка пролет“, а за крајот на академската година планираат концерт на познат бенд на отворено.
Пијанистката Попивода рече дека на утрешниот концерт ќе настапи со композиции од Димитрие Бужаровски кои се базирани на македонски народни теми.
- Практично, македонските народни песни се преработени во една класично пијано-верзија, со примеси на џез, експресионизам, импресионизам. Сметам дека публиката навистина ќе ужива препознавајќи ги познатите македонски песни, кои во минатото, но и денес, се изведуваат и се пеат на вечерните седенки, рече Попивода.
Меѓу композициите кои ќе ги исполни македонската пијанистка се „Зајди, зајди“, „Дали паметиш Милице“, „Шеќерна“, „Калеш Анѓа“ и „Не си го продавај Кољо чифликот“.
Ново на Сител
-
Приведен криминалец баран со потерница за казна затвор од три години
-
Тројца Израелци убиени во вооружен напад на граничен премин меѓу Израел и Јордан
-
ИДФ: Повеќе од 50 ракети истрелани од Либан врз северниот дел на Израел
-
АХВ казни нерегистрирани производители на сирење во Прилеп и Скопје
-
Димитриевски: Да се трудиме да останеме сплотени и единствени како држава
-
Во пресрет на дебатата, Трамп се заканува со затвор за вмешаните во „изборната кражба“
-
Шеф на ЦИА: Западот не треба да се плаши од руските нуклеарни закани
-
Приведени криминалци во Скопје барани со потерници за извршени тешки кражби