Универзитетот „Св.Климент Охридски“ го одбележува патрониот празник

Универзитетот „Св.Климент Охридски“ - Битола почна со реализација на програма посветена на 8. Декември - Ден на Патронот на вториот државен универзитет во Република Македонија.

Денот на Свети Климент Охридски, првиот македонски епископ, е врежан во македонската историја, а Климентовото дело е темел на високото образование во државата, истакна ректорот Сашо Коруновски на денешната свечена академија што се одржа во Битола.

- Денешната свеченост претставува вовед пред големиот настан што ќе се случи во 2016 година кога на наша иницијатива и на државно ниво ќе се одбележува 1100 годишнината од упокојувањето на Свети Климент Охридски. Подготовките се во тек, формиран е организациски одбор и секоја наша активност ќе биде посветена на големиот просветител Свети Климент Охридски, нагласи ректорот Коруновски.

На Универзитетот „Св. Климент Охридски“-Битола во моментов студираат околу 10.000 студенти и според ректорот Коруновски, овој Универзитет е во категоријата на средно-големи универзитети со голема предност што воедно е и регионален Универзитет.

- Денес, повеќе од 1100 години подоцна, во поширокиот регион на лулката на првиот словенски универзитет, живеејќи во едно друго време, време на брз развиток и технологии и неограничен проток на информации, кога потребата за образование, усовршување и напредок станува императив за секој поединец, и нашиот Универзитет своето функционирање го заснова врз креирањето на такво опкружување во кое образованието на секој млад човек претставува долгорочна мисија и наша визија, рече меѓу другото ректорот Коруновски на свечената академија во Битола.

Во рамките на прославата на патрониот празник на  Универзитетот „Св.Климент Охридски“ , утре во Охрид ќе биде одржана свеченост по повод 45 години од формирањето на Факултетот за туризам и угостителство, а на 17 декември во Прилеп ќе бидат одбележани 55 години од формирањето на Економскиот факултет.