Во гостиварско почна попишувањето на населението, обезбедени се сите услови

Пописот на населението, домаќинствата и становите во гостиварско се одвива во 317 пописни региони и според општинската пописна комисија обезбедени се сите услови.

Инструкторот од Државниот завод за статистика Зирап Адеми, кој го следи процесот на попишување, е оптимист дека оваа статистичка операција ќе биде спроведена успешно.

– Попишувачите ќе бидат на терен од 8 до 20 часот и првично ќе попишуваат од три до четир семејства дневно. Планот предвидува оваа бројка да достигне до десет семејства во еден ден, изјави Адеми.

Од вкупниот број попишувачи, над 70 проценти се вакцинирани. Доколку некое семејство одбие да биде попишано од невакцинирани лица, тие ќе бидат заменети со попишувачи кои имаат примено вакцина против Ковид 19.

Во гостиварско има 170 попишувачи, четири помалку од предвиденото. Според информациите од општинската пописна комисија, непополнет е бројот на попишувачи за македонската заедница, додека за останатите по третиот конкурс пополнети се планираните места.