Во Холандија се олеснува процесот за азил на децата на мигрантите

Владејачката коалиција на холандскиот премиер Марк Рут, составена од четири политички партии, синоќа постигна договор за политички чувствителното прашање – дали на стотици млади мигранти треба да им биде дозволено да останат во таа држава.

Холандскиот министер за миграции, Марк Харберс изјави дека според тој договор повторно ќе се разгледаат бројните апликации на деца кои барале азил и биле одбиени.

Како што објавија холандските медиуми, досега се опфатени 700 деца.

Според договорот, службениците за имиграција ќе добијат поголеми овластувања за да го забрзаат процесот за давање азил, а министерот за миграција ќе го изгуби дискрециското право да одобрува дозволи за привремен престој во исклучителни околности.

Холандската политика, позната како „помилување на децата“, воведена во 2013 година, предвидува давање азил за децата кои се во земјата повеќе од пет години, додека нивните барања за азил ќе бидат разгледани доколку тие исполнуваат одредени критериуми.

Сепак, правните застапници за деца велат дека се прифатени многу малку барања.