Во Кавадарци изложба на фотографии од Александар Ѓорѓиев

Во галеријата на Домот на културата „Иван Мазов Климе" од Кавадарци, синоќа беше отворена изложба на фотографии од Александар Ѓорѓиев, насловена „Анаграми за себепрепознавање“.

Владимир Темков, директор на културниот дом, рече дека е пријатно изненаден од начинот на кој  Ѓорѓиев ја практикува дисциплината уметничка фотографија, преку принтови  на платно.   

- Во оваа галерија направени се бројни изложби на фотографии, но вакво нешто се прави прв пат. Оттаму, пријатно сум изненаден и од начинот на кој платното го прима принтот или уметничката фотографија и ја презентира онака како што ја чувствува авторот, додаде Темков.

Во своето обраќање кон присутните, Ѓорѓиев истакна дека  со фотографија се занимава од 1980 година и поминал многу фази кога е фотографијата во прашање. Од црно бела преку  колор,   до дигитална фотографија.

- Денес е многу битно да се изразуваш преку фотографија, денес е многу битно да испратиш информација во моментот,  бидејќи се понатаму не се признава, нели. Тоа го правиме преку социјалните мрежи. И денес е многу битно што се изразуваме во колор, нагласи тој. 

Александар Ѓорѓиев е роден 1963 година  во Прилеп, а од 1974  година живее и работи во Скопје. Работел како фотограф и уредник на фотографија во “Нова Македонија“, “Екран“ и “Фокус“. Денес работи во Министерството за култура, во секторот за односи со јавноста. Автор е на повеќе фото монографии, а соработувал и со повеќе познати македонски филмски и ТВ режисери како Милчо Манчевски, Димитар Османли, Младен Крстевскии други.