Во Штип дебата за Националната стратегија за млади

Агенцијата за млади и спорт заедно со Советот на млади-Штип денеска организираа јавна дебата за Нацрт стратегијата за млади, која ќе важи за периодот од 2016 до 2025 година.

Директорот на Агенцијата за млади и спорт, Марјан Спасевски истакна дека на почетокот на годината заедно со УНДП почнале да ја креираат новата национална стратегија за младите, а ова е 11. јавна дебата во земјава. Појасни дека во националната стратегија ќе бидат дефинирани и таргетирани сите проблеми и предзвици на младите во земјава. Во стратегијата дефинирани се девет приоритети, а во работните групи учествивале 150 лица претставници на младите и на невладиниот сектор.

- Деветте приоритени области се оние кои што претходно беа дефинирани во претходната национална стратегија за младите. Тоа се образованието, вработувањето и подршката при вработување, културата, спортот, здравството и превенцијата, локалната младинска работа, младинското учење, квалитетот на живеење и младинското информирање. Во сите овие области имавме убави предлози кои директно беа инволвирани во процесот на креирање на Националната стратегија за младите, изјави Спасевски.

Претседателката на Советот на млади-Штип, Сања Стефанова нагласи дека на јавната дебата на која се присутни ученици од повеќе училишта во градот, но и претставници од младинските организации се слушнаа повеќе предлози за учеството на младите при креирање на одредени реформи и се дадоа предлози за одредени мерки кои ќе им помогнат.

Таа рече дека на младите им недостасува мотивација да учествуваат во одредени активности, како што е спортскиот живот.

- Во текот на изминатиот период се отворија голем број на спортски терени во Штип. Сепак сметаме дека на младите им недостасува и мотивација за да бидат дел од спортскиот живот во градот, изјави Стефанова.