Вратата кон НАТО треба да остане отворена, оцени украинскиот премиер

Украина треба да се бори за брзо пристапување кон НАТО, изјави вчера украинскиот премиер Володимир Гројсман во интервју за германската медиумска група „Функе", пренесе ДПА.

Гројсман изјави дека Украина треба да ја задржи вратата кон НАТО отворена и посочи дека преземените реформи се насочени кон модернизација на украинската армија. Тој изјави дека се надева дека на Самитот во Варшава следната недела, Алијансата ќе понуди јасна стратегија за Украина.

Минатиот месец Украина декларираше дека е подготвена да помогне во плановите на НАТО за зајакнување на военото присуство на Алијансата во Источна Европа. Се очекува овие планови да се обликуваат финално на средбата во Варшава, на која ќе присуствува и украинскиот претседател Петро Порошенко. На истата средба се очекува да се одобри и помош на НАТО за Украина. Русија повеќе пати го осуди проширувањето на НАТО кон исток, оценувајќи го како закана за својата национална безбедност, потсетува ДПА.