Зголемен прометот во индустријата

Прометот во индустријата во јули во однос на јуни годинава е зголемен за 1,7 проценти, а споредено со јули лани за 13,1 процент, објави денеска Државниот завод за статистика. 

Во периодот јануари-јули годинава, во однос на истиот период минатата година, е регистрирано зголемување на прометот во индустријата  за 10,4 проценти.

На домашниот пазар во јули оваа година споредено со јули минатата остварениот промет во индустријата бележи пораст од 3,5 проценти, а прометот остварен на странските пазари пораст од 16,1 процент. 

Гледано по сектори, прометот во индустријата во секторот „рударство и вадење камен“ во јули годинава во однос на јули 2015 година, бележи пораст од 13,5 проценти, а во секторот „преработувачка индустрија“ пораст од 13,1 процент. 

Според главните индустриски групи, прометот во јули годинава, во однос на јули лани е зголемен кај „интермедијарни производи, освен енергија“ за 8,3 проценти, „капитални производи“ за 14,8 проценти, „трајни производи за широка потрошувачка“ за 14,9 проценти и „нетрајни производи за широка потрошувачка“ за 16,9 проценти.