Бизнис секторот подготвен финансиски да ги поддржува локалните НВО

Приватниот сектор од Тетово е подготвен да соработува и финансиски да ги поддржува локалните невладини организации, беше речено на денешната средба на претставниците на Стопанската комора на северозападна Македонија (СКСЗМ) ги Фондацијата Албиз со бизнисмените и НВО од овој град. 

Како што соопшти Комората, еден од предлозите за обезбедување финансиска поддршка е Фондацијата да генерира средства од бизнис секторот за имплементација на програмските активности на невладините организации.

- Невладините организации од Тетово досега немале соработка со приватниот сектпр на посакуваното ниво зашто пристапот кон нив не бил доволен. Тука треба да се нагласи подготвеноста на приватниот сектор од овој регион за поддршка на активностите на невладините организации, информира Комората.

Главната цел на средбите од овој тип, стои во соопштението, е воспоставување долгорочни ефективни партнерства меѓу двете страни кои на крајот би резултирале со поголем капацитет на локалните невладини организации да генерираат приходи од бизнис секторот, но и од други фондови.

Средбата во Тетово се организира во рамки на проектот „Финансиска одржливост на НВО во соработка со бизнис секторот“, имплементиран од Фондацијата Албиз и СКСЗМ со поддршка на ЕУ. Целта на проектот е поголема одржливост на граѓанските општества во земјава преку зголемување на финансиската независност. 

Средби со бизнисите и локалните НВО до крајот на месецов ќе се одржат и во други градови низ Македонија.