Деветто издание на „Славење на Пирејот“

Во Слоештица, Демирхисарско вечер на Голема Богородица, со почеток во 18:30 часот ќе започне манифестацијата „Славење на Пирејот“ - деветто чествување за бардот на македонската литература Петре М. Андреевски.

Манифестацијата во родното место на Андреевски и неговото вечно почивалиште, ќе ја отвори со беседа проф. д-р Елизабета Шелева.

- ...Кај Петре М. Андреевски љубовта кон родната земја и националната културна традиција природно се кондензира, во облик на исконска, искрена емоција, достојна за најголемите и највисоките креативни предизвици. Таа лојалност и љубов спрема татковината не е плод на бесрамна кокетерија, реторичка поза, ниту конформистичко додворување кон моменталните „авторитети“ на власта. Во таа смисла, Петре остануваа неумоливо остар и критичен, како и секој вистински, непоткуплив автор, кој достоинствено држел пред сѐ до својот личен интегритет и чест – знаејќи, дека, како „човек на зборот“ - тоа е сѐ што има, а лесно може да го загуби, доколку би ги изневерил сопствените строги, артистички принципи и личната непоткупливост, пишува Шелева за Андреевки.

Програмата ќе продолжи на уметничкото гумно, каде ќе биде отворена изложба на делата создадени за време на овогодинешната меѓународна уметничка резиденција на Арт Поинт - Гумно 2015, како и на портрет-фотографии на уметниците од Сашо Н. Алушевски.

На гумното ќе бидат промовирани и резултатите од проектот „Поздравете ги птиците од Илинска и Плакенска Планина“ што организаторите го спроведуваат со поддршка од Македонското еколошко друштво и Еуронатур од Германија. 

- Посебен „зачин“ на програмата ќе биде оригиналниот сценски перформанс: „Слојчки приказни кажани од Дедо Илија Кочовски“ во изведба на млада актерска тројка (сите со потекло од с. Слоештица) и режија на Андреј Цветановски. Цветановски е воедно и автор на документарниот филм „Животиште‟ (посветен на неговиот татко) што премиерно ќе биде прикажан на сцената - мост Бела Река, најавуваат организаторите.

Годинава, манифестацијата е делумно поддржана од страна на Министерството за култура и градоначалникот на општина Демир Хисар, Љупчо Блажевски.