Костадинов: Струмичките пожарникари ќе бидат најплатени во државата, плата од 80.000 денари

Хероите на Струмица нашите пожарникари спасители од септември ќе ја добијат заслужената награда за својата храброст и пожртвуваност. 

Со новите решенија тие ќе бидат најплатени во Македонија, со месечна плата од 80.000 денари, објави на неговиот фејсбук профил градоначалникот на Струмица, Костадин Костадинов.

Според него, тоа е најмалку што можело да се направи за луѓето кои секојдневно го ризикуваат сопствениот живот за да спасат туѓ.

- Истовремено, потпишани се решенијата и за сите вработени во општинската администрација, кои согласно колективниот договор ќе добијат 20 отсто зголемување на платите. Тоа е порака дека трудот и посветеноста во служба на граѓаните не остануваат незабележани, додава во објавата Костадинов.

Струмичкиот градоначалник смета дека ниту една бројка не може да ги надомести сите стресови, ризици и одговорности, но ова било доказ дека Струмица знаела да каже благодарам не само со зборови, туку и со дела.

МИА