Македонија со шест таеквондисти на Европското првенство во Талин

Естонската престолнина Талин од утре до 5 мај ќе биде домаќин на Европското таеквондо ИТФ првенство на кое настапат шест македонски натпреварувачи.

Боите на Македонија ќе ги бранат Христијана Парулеска – јуниорки 16-17 години во форми црн појас 1 дан и борби-58 кг, Давид Крстески – јуниори 16-17 години во форми црн појас 1 дан и борби-63 кг, Божидар Димитриевиќ – сениори 18-35 години во форми црн појас 1 дан и борби-85 кг, Миа Танеска – кадетки 11-13 години во форми за црвен појас и борби +55 кг, Марио Крстески – сениори 18-35 години во спаринг борби-58 кг и Владимир Димитриевиќ – јуниори 16-17 години во спаринг борби-69 кг.

По успешно завршените подготовки, македонската репрезентација пред заминувањето во Талин ја ја посети охридскиот градоначалник Кирил Пецаков, посакувајќи им успешен настап на Европското првенство.

„Сите учесници на репрезентацијата со посетата на градоначалникот Кирил Пецаков добија дополнителна мотивација за претставување на боите на нашата држава и изразија подготвеност да дадат сè од себе, за да можеме повторно да се гордееме со нив. Оваа посета ја пренесува важноста на поддршката за спортските тимови и мотивирањето на спортистите, особено кога станува збор за претставување на земјата на меѓународни натпревари“, изјави претседателот на Македонската Таеквондо федерација (МТТФ) Марјанчо Лазаревски.