Македонски автори на Салонот на стрип во Белград

Македонски автори традиционално и годинава учествуваат на 16. фестивал Салон на стрип Белград, кој  од 27 до 30 септември, се одржува во главниот град на Србија.

На меѓународниот натпревар, во рамки на манифестацијата, меѓу 377 учесници од целиот свет кои конкурирале со вкупно 334 стрипа, застапени се и 21 автор од Македонија. Со тоа, веќе втора година по ред, Македонија е втора земја по бројот на учесници, веднаш зад домаќинот Србија. 

Меѓу најдобрите сто стрипа кои во „Среќна галерија“ во склоп на Студентскиот културен центар во Белград ќе бидат изложени до 12 октомври, а се во потесниот избор за награда, дел се на автори од Македонија. Станува збор за стрипот „Девојче на Месечината“ на Александар Стеванов од Штип и „Човек за сите времиња“, стрип кој по текст на српскиот сценарист Марко Стојановиќ го илустрира Михајло Димитриевски (Тхе Мичо) од Битола.