МВР и ОБСЕ потпишаа Меморандум за разбирање за контрола на лесното оружје и муниција

Петнаесет погранични полициски станици во Македонија и еден регионален центар за гранични работи ќе добијат можност за зголемување на физичката и информатичко-технолошка безбедност на залихите на мало лесно оружје и муниција, во насока на побезбедно чување на залихите и спречување на нивна кражба и евентуалниот натамошен шверц, согласно Меморандумот за разбирање меѓу Министерството за внатрешни работи и Мисијата на ОБСЕ.

Меморандумот денеска во Скопје го потпишаа министерот за внатрешни работи Оливер Спасовски и амбасадорката на Мисијата на ОБСЕ во Македонија, Нина Суомалаинен. 

Проектот се реализира со финансиска помош од ЕУ и амбасадата на Германија во земјата, а во соработка со МВР. На потпишувањето присуствуваа и германскиот амбасадор Томас Герберих и претставникот на делегацијата на ЕУ, Тибор Варади.

- Целта на проектот е ОБСЕ во соработка со МВР и граничната полиција да се зајакне пограничната контрола, шверцот со лесно оружје и муниција, но и да се зајакне борбата против организираниот криминал и транснационалните ризици, рече Суомалаинен.

Додаде дека е предвидено зајакнување на безбедноста на објектите, во кои се чуваат оружјето и муницијата, преку надградување на системот за управување со залихите и обука на оние кои се задолжени за обезбедувањето.

Ова иницијатива, додаде Суомалаинен има регионална важност, бидејќи со неа се прави обид да се спречат евентуалните кражби на оружјето и муницијата и понатаму нивниот евентуален шверц низ земјите во регионот. 

- Овие активности се наша обврска како земја-членка на ОБСЕ, заеднички да придонесеме за регионалната безбедност, истакна министерот Спасовски. 

Посочи дека опасноста од пролиферацијата на лесното оружје и муниција, детектирана како сериозен проблем, свое место најде и во стратегијата за контрола на малото и лесно оружје  на Владата.

- Заложбата на Владата е пренесена во стратешкиот документ за извршувањето на превенцијата, контролата и искоренување на пролиферацијата на нелегалното оружје согласно меѓународните иницијативи и документи за конторола на оружјето, муницијата и експлозивните материи, нагласи Спасовски. 

Проектот се спроведува во период од две години, од 1 октомври оваа година до 30 септември 2019 година. Вредноста на проектот изнесува 1.086.960 евра.