Орбан: Унгарија нема да го спроведе миграцискиот пакт на ЕУ, нема да прифаќа мигранти

Премиерот на Унгарија, Виктор Орбан, денеска изјави дека земјата нема да го спроведе пактот за миграција на Европската Унија „сè додека има национална, патриотска Влада“ во таа земја.

„Брисел издаде наредба. Миграцискиот пакт се активира. Би сакал еднаш засекогаш да бидам јасен: сè додека Унгарија има патриотска Влада, нема да го примениме пактот за миграција“, рече Орбан во видео порака објавена на Фејсбук, пренесе унгарската новинска агенција МТИ.

Тој нагласи дека Унгарија нема да прифати мигранти и дека нема да им даде ниту еден евро.

Пактот за миграција и азил е збир на правила на ЕУ што треба да започне да се применува од јуни 2026 година, а неговата цел е да создаде ефикасни и унифицирани процедури за управување со пристигнувањата, да обезбеди праведна распределба на товарот меѓу земјите членки и да воспостави солидарност, истовремено заштитувајќи ги основните права на мигрантите.

МИА