Почнува фестивалот за класична гитара „Тремоло“

Од денеска до 27 март ќе се одржи интернационалниот фестивал за класична гитара „Тремоло во организација на Детскиот културен центар – „Карпош“ и Град Скопје.

По седми  пат во Скопје и Македонија ќе се одржи и интернационален натпревар за класична гитара во сите ученички, средношколски и студентски категории, како и мастер часови.

Фестивалот се повеќе прераснува во културна манифестација која ги обединува љубителите на класичната гитара, учениците, педагозите не само од Скопје и Македонија туку и пошироко.

На Фестивалот како жири комисија, педагози  и  гости до сега биле и настапувале многу светски гитаристи и групи, како што се; Герхард Рајхембах од Германија, Квартет 'Leggero' од Хрватска, Бошко Радојковиќ, Срѓан Тошиќ и Зоран Крајишник од Србија, Дуо Чили, Дамјан Пејчиновски од Македонија.

Оваа година членови на жирито се светски прочуените гитаристи Антонио Фрушела од Италија, Штефан Шмит од Германија, Џевдет Сахатчија од Косово, Зоран Аниќ од Србија и Борче Наумовски и Миле Каровски од Македонија.

За победниците по категории се предвидени вредни награди, а главната награда, акустична гитара, рачно изработена во Германија од Armin& Mario GROOP ќе му припадне на најдобриот  кој ќе се натпреварува во седмата категорија ( без возрасен лимит ) .

Утре и задутре ќе се одржат и два  концерти  во “Културно информативниот центар“-КИЦ –Салон 19/19 , а на 26 март, во–Концертна сала на ФМУ и на 27 март во Концертна сала на ДКЦ “Карпош“ настап на победниците на натпреварот.