Препад и уништување на терористички камп, спасување заложник, вежба на армискиот полигон Криволак

 – Препад и уништување терористички камп, спасување заложник, патролирање и заседа, беа дел од активностите кои денеска ги реализираа учесниците на теренската вежба „Есенска бура“. Припадниците на АРМ и МВР, покажаа како со координиран настап се справува со сите безбедносни предизвици.

Вежбата „Есенска Бура“ се реализира од 8 ноември до 13 ноември 2018 година, а приказ од изведените активности беше организиран на денот за високи гости.

На вежбата, која е прва ваква интерагенциска и интеринституционална, учествуваа  околу 400 припадници од сите единици, од кои 30 од ДЗС, двајца од ЦУК, 50 од МВР и 318 припадници на АРМ.

Цел на вежбата е унапредување на интероперабилноста и кризниот менаџмент како одговор  на модерните закани. Воедно со вежбата се врши тестирање на борбената готовност на единиците, подготвеноста за експедициски мисии и кризен менаџмент.

На вежбата учествуваа припадници од „Волците“ и „Ренџерите“ на АРМ заедно со „Тигрите“ и „Единицата за брзо распоредување“ на МВР, поддржани од воздухопловната и други состави од Здружената Оперативна Команда (вод на воената полиција и чета од 1.механизирана пешадиска бригада), како и учество на Дирекцијата за Заштита и Спасување и Центарот за Управување со Кризи.

Честитајќи им за успешната вежба, министерката Радмила Шеќеринска рече дека соработката помеѓу сите овие успешни субјекти е многу важна.

-Мило ми е што како со учеството во мировни операции во странство, така и со овие вежби дома, покажуваме дека имаме армија со која Македонија може да се гордее, рече министерката.

Таа се осврна на второто освоено место во Англија на македонската ренџерска екипа и успехот на снајперистите во Кина кои исто така освоија сребро.

Нагласи дека армијата е институција во која вреди да се продолжи да се инвестира. Две години по ред се зголемуваат средствата за армијата. Најави дополнително зголемување на платите за припадниците на Армијата, но, зголемување и за вработените во Министерството за одбрана. Резултатите нема да изостанат, рече, кога се знаат приоритетите.

Задоволство од вежбата изрази и министерот за внатрешни работи Оливер Спасовски. И тој се осврна на зголемување на буџетите и платите во министерствата  за одбрана и внатрешни работи