Шпанската Влада ги повлекува полициските засилувања од Каталонија

Почна повлекувањето на дополнителните полициските единици, испратени во Каталонија за време на референдумот за независност на 1 октомври, соопшти шпанското Министерство за внатрешни работи.

- Поддршката за полицијата и цивилната гарда, испратени во Каталонија, ќе бидат постепено повлекувани до 30 декември, изјави портпарол на Министерството. Тој не соопшти колку полицајци ќе бидат повлечени. 

Според весникот „Пајс“, во регионот се распоредени околу 10.000 полицајци.

На денот на референдумот, сцените на полициско насилство при одземањето на гласачките кутии и затворањето на избирачките места го обиколија светот и овозможија сепаратистите да ги осудат репресиите на Мадрид. Според медицински извори, тогаш беа повредени најмалку 92 лица, а сепаратистичките власти соопштија дека околу 900 лица побарале медицинска помош.

Каталонија има сопствена автономна полиција „Мосос д’Ескуадра“, а националната полиција и цивилната гарда имаат второстепена улога во областа.