Словенија прва провeрка за македонските ракометари пред ЕП во Полска

- Машката  ракометна репрезентација на Македонија денеска во Кршко против Словенија ќе го одигра првиот од вкупно четирите контролни натпревари во рамките на последната фаза од подготовките за претстојното Европското првенство што од 15 јануари почнува во Полска.

 

Според селекторот Ивица Обрван дуелите против Словенија на гостински терен се одлична можност да се провери моменталната подготвеност на ракометарите, а воедно да се почувствува барем делумно и притисокот од настап на гостински терен.

 

-Словенија е одличен избор. Тие имаат многу квалитетна репрезентација, а за нас се одличен спаринг партнер во овој дел од подготовките, изјави селекторот Обрван.

 

Почетокот на натпреварот е во 18 часот.

 

Вториот меѓусебен пријателски дуел на двете репрезентации е утре во Цеље со почеток 18 часот и 30 минути.

 

По враќањето во Скопје, репрезентацијата ќе продолжи со тренинзи, а на 10 и 11 јануари ќе одигра уште два натпревари против Црна Гора.