Соботка: Европа нема да интервенира против ИД, тоа мора да го направат Арапите

Чешкиот премиер Бохуслав Соботка смета дека воена интервенција на членките на коалицијата на повеќе од 60 земји, кои заедно се против Исламската држава (ИД) нема да го реши конфликтот во Сирија, туку тоа треба да го сторат самите арапски едеиници.

Ова го изјави Соботка пред денешниот Самит за борбата против ИД и тероризмот во Њујорк, на првата средба на највисоко ниво на сојузничката коалиција, чиј домаќин е американскиот претседател Барак Обама, јави дописникот на МИА од Прага.

- Ние, подготвуваме и проект за обука на ирачките полицајци и снабдување на авионите Л- 159, за употреба на ирачката влада, рече Соботка на Чешката државна телевизија (ЧТ).

Република Чешка е една од активните учесници на коалицијата и досега има испратено помош во муниција во Ирак, најголем дел за курдските борци и обезбедува хуманитарна помош за Курдистан, каде има многу бегалци.

- Доколку сакаме да ја совладаме миграциската криза, треба значително да ја ослабнеме Исламската држава, додаде Соботка, кој потенцираше дека главната работа е на арапските држави, со оглед на тоа дека Европа ги поддржува воздушните напади и курдските и ирачките борци.

- Долготрајниот конфликт меѓу шиитите и сунитите во тој регион не може да се реши со еднократна воена интервенција и никако не со некаков европски или Северноатлантски експедициски корпус. Останува обука, вооружување и воздушна поддршка, оцени Соботка.

Тој наведе дека воената акција во Ирак, Авганистан и дел во Либија не донесе трајно решение.

Осврнувајќи се на проблемот со мигрантите од Сирија и спротивставувањето на Чешка да се одредуваат квоти на бегалци во европските земји, тој рече дека Чешка ќе се обидува и понатаму да бара сојузници по ова прашање.