Состанок на директорите на средните училишта во Гостивар за поголема безбедност и толеранција

 Директорите на четирите средни училишта во Гостивар и отсекот за превенција при СВР Тетово имаа заеднички состанок на кој се зборуваше за досега преземените мерки, превентивните проекти и прашања од безбедносен карактер.

Средбата беше на иницијатива на СВР Тетово и општина Гостивар и е дел од активностите непосредно поврзани со превентивно-едукативниот проект „Безбедни училишта-за меѓуетничи соживот и толеранција“

– Претставниците на Отсекот за превенција, ги запознаа присутните на состанокот со досегашните и планираните идни превентивни активности со кои беа и ќе бидат опфатени средните училишта во Гостивар. Тие имаат за цел навреме да се препознаат и отстранат можните причини за нарушувања на јавниот ред и мир, рече Марјан Јосифоски портпарол на СВР Тетово.

Раководителите на училиштата го поздравија зголеменото полициско присуство во периодот пред и по завршувањето на наставата и посебно во меѓусмените. Тие, исто така, побраа тоа да продолжи во текот на целата учебна година.

Заедничка оценка од состанокот беше координирано да се партиципира и придонесе за поголема безбедност на учениците, не само додека се на настава, туку и воопшто, по завршувањето на часовите и заминувањето кон нивните домови. Ваквите активности во значителна мера го намалија бројот на нарушувања на јавниот ред и мир и тепачки кои претходно се случуваа меѓу средношколците.