Во Одеса киднапиран украински пратеник

Непознати напаѓачи во јужниот украински град Одеса го киднапирале пратеникот Олексиј Хончаренко, пренесоа британските медиуми, повикувајќи се на негов колега и на регионалните власти.

-Олексиј Хончаренко беше грабнат од непознати луѓе во Одеса среде бел ден, изјави во Парламентот претседателот на парламентарната група на „Блокот на Петро Порошенко“, Игор Хринив.

Хончаренко (36) е роден во Одеса и е еден од заменик шефовите на групата на „Блокот на Петро Порошенко“ во украинскиот Парламент. Тој е познат по своите критични ставови за мноштво политички прашања.

Обвинителството во Одеса потврди дека парламентарецот е грабнат, но не даде никакви детали за настанот.

-Во пронаоѓањето на  Хончаренко се вклучени сите расположливи сили и групи за потраги, изјави портпаролот на главниот обвинител, цитиран од ТАСС.

Претходно Хончаренко беше член на Партијата на регионите и го предводеше регионалниот совет на Одеса, потсетува ТАСС.

Тој е син на поранешниот градоначланик на Одеса, Олексиј Костусев.